ታላቁ የኢትዮጵያ የህዳሴ ግድብ ፕሮጀክት ለግሉ ዘርፍ ኢንቨስትመንት የጀርባ አጥንት መሆኑ ተገለጸ።
ነሀሴ 8/2017ዓም (ው.ኢ.ሚ)የውኃና ኢነርጂ ሚኒስቴር ሚኒስትር ክቡር ዶ/ር ኢ/ር ሀብታሙ ኢተፋ በደቡብ አፍሪካ ኬፕ ታውን ከተማ እየተካሄደ በሚገኘው የአፍሪካ የውኃ ኢንቨስትመንት ሰሚት (AU AIP Africa Water Investment Summit 2025) ጉባኤ የሁለተኛ ቀን የሚንስትሮች ከፍተኛ የፓናል ውይይት ላይ ስለ ታላቁ የኢትዮጵያ ህዳሴ ግድብ ፕሮጀክት ተጠይቀው ማብራሪያ ሰጥተዋል፡፡
ክቡር ሚንስትሩ ኢትዮጵያ እንደማሳያ በዘርፉ በማጠናቀቅ ላይ ስላለችው ታላቁ የአትዮጵያ ህዳሴ ግድብን በተመለከተ የኃይል ማመንጫ ግድብ ግንባታ ፕሮጅቱ ፋይናንስ ስለተደረገበት ሁኔታ ተሞክሮዋን እንድታካፍል ተጠይቀዋል፡፡
ክቡር ሚንስትሩ በምላሻቸው ታላቁ የኢትዮጵያ ህዳሴ ግድብ ፕሮጀክት ቀደም ባሉትመንግስታት ዘመን እንዲጀመር ዓለም አቀፍ የፋይናንስ
ተቋማትን የበጀት ድጋፍና ብድር ጠይቃ ማግኘት ባለመቻሏ ቀጣዩ ትውልድ እንደሚገነባው በማመን የዛሬውን ትውልድ እንዲጠብቅ መገደዱን ገልጸዋል።
ግድቡ በዋናነት በመንግስት አቅም በሀገር ውስጥ እና ባህር ማዶ በሚገኙ ውድ ኢትዮጵያውያን ዲያስፖራ አባላት ቀጥታ ተሳትፎ የተገነባ የአፍሪካ ኩራትና የኃይል ምንጭ ፕሮጀክት ነውም ብለዋል፡፡
ክቡር ሚንስትሩ አክለውም ግድቡ በሙሉ አቅሙ ሥራ ሲጀምር ከ5,150 ሜጋ ዋት (5.15ጊጋ ዋት) የማመንጨት አቅም የሚኖረው ሲሆን በግንባታ ሥራው የግሉ ዘርፍ ባለሀብቶች በቀጥታ በመሳተፍ አሻራቸውን ያስቀመጡበት ከኃይል ምንጭነት በዘለለ የኢኮኖሚ ትራንስፎርሜሽን ዋና ምሰሶ ነው ብለዋል፡፡
ታላቁ የኢትዮጵያ ህዳሴ ግድብ ግንባታ ፕሮጀክት ሲጠናቀቅ በዋናነት በግሉ ዘርፍ ላለው ክፍለ ኢኮኖሚ በእጅጉ ትልቅ የኢንቨስትመንት ዕድል ይዞ ይመጣል ያሉት ክቡር ሚንስትሩ ለዚህ ማሳያው በዘላቂ ልማት ግቦች ውስጥ የውኃና ኃይል አቅርቦት የጀርባ አጥንት ሆነው ለሌሎች ግቦች በአማካኝነት የሚያገለግሉ መሆናቸውንም በአጽኖት አንስተዋል፡፡
በሌላ በኩል ኢትዮጵያ ቀጠናዊ የኃይል ትሥሥርን በመፍጠር ረገድ በቀዳሚነት ሚናዋን እየተጫወተች ነው ያሉት ክቡር ሚኒስትሩ በምስራቅ አፍሪካ ቀንድ ከሚገኙ ሀገራት መካከል ከሱዳን፣ ኬንያ፣ ጅቡቲ፣ ታንዛኒያ…ሀገራት ጋር የኃይል አቅርቦት እያደረገች ሲሆን ከሌሎች ቀሪ ሀገራት ጋር ደግሞ ስምምነቶች ተደርገው በሂደት ላይ መሆኑን ገልጸዋል ፡፡
የክቡር ሚንስትሩን ማብራራያ ተከትሎ በጉባኤው ላይ የሚገኙ የተለያዩ ሀገራት የውኃ ሚንስትሮች እና ከፍተኛ የመንግስት የሥራ ኃላፊዎች ከክቡር ሚንስትሩ ጋር የሁለትዮሽ ውይይት ለማድረግ ጠይቀዋል፡፡
ከእነዚህም መካከል የዚምባቡዌ የውኃና ግብርና ሚንስትሩ በቀጥታ የተሞክሮ ልምድ ለመቅሰም ከጠየቁ ሀገራት መካከል በቀዳሚነት ይጠቀሳሉ፡፡
