በጎፋ ዞን የሳውላ ከተማ ንጹህ የመጠጥ ውሃ ፕሮጀክት ተጠናቆ አገልግሎት መስጠት ጀመረ።

በጎፋ ዞን የሳውላ ከተማ ንጹህ የመጠጥ ውሃ ፕሮጀክት ተጠናቆ አገልግሎት መስጠት ጀመረ።

ሀምሌ 6/2017 ዓ.ም (ው.ኢ.ሚ) የውሃና ኢነርጂ ሚኒስቴር በውሀ ልማት ፈንድ መካከለኛ ከተሞች የአንድ ቋት ፕሮግራም በኩል በጎፋ ዞን ሳውላ ከተማ በ300 ሚሊየን ብር ወጭ ያስገነባው የንጹህ መጠጥ ውሃ ፕሮጀክት ተጠናቆ አገልግሎት መስጠት ጀምሯል።

ፕሮጀክቱ አገልግሎት መጀመሩን በስፍራው ተገኝተው ያበሰሩት የደቡብ ኢትዮጵያ ክልል ርዕሰ መስተዳድር ክቡር አቶ ጥላሁን ከበደ የከተማዋን ህዝብ የንጹህ መጠጥ ውሃ ፍላጎት ጥያቄ መሠረት በማድረግ ከ300 ሚሊየን ብር በላይ ወጪ ከአለም ባንክ በተገኘ ብድር እና በክልሉ መንግስት ማችንግ ፈንድ ብድር በውሃና ኢነርጂ ሚኒስቴር ውሃ ልማት ፈንድ በኩል ተሰርቶ ለዚህ በቅቷል ብለዋል።

ፕሮጀክቱ ውጤታማ አገልግሎት እንዲሰጥ የአካባበቢው ማህበረሰብ በእኔነት ስሜት መጠበቅና መቆጣጠር አለባችሁ በማለትም አሳስበዋል።

የሳውላ መጠጥ ውሃ ፕሮጀክት ከ135ሺ በላይ የህብረተሰብ ክፍሎችን የመጠጥ ውሃ ተጠቃሚ እንደሚያደርግ ገልጸው፤ በፕሮጀክቱ በዘላቂነት ለመጠቀም የአካባቢው ህብረተሰብ የክፍያ ስርዓቱን ተከትለው የአገልግሎት ክፍያቸውን በመክፈል መጠቀም እንዳለባቸውም ገልጸዋል።

ውሀውን በዘላቂነት ለመጠቀም እና የውሃ ሀብቱን በዘላቂነት ለመጠበቅ ችግኞችን በመትከል በመንከባከብና በመጠበቅ የፕሮጀክቱን ዘላቂነት ማረጋገጥ የሁሉም ሀላፊነት መሆኑን አሳስበዋል።

በመጨረሻም ለዚህ ፕሮጀክት መሣካት የውሃና ኢነርጂ ሚኒስትር ክቡር ዶ/ር ኢ/ር ሀብታሙ ኢተፋ እና ባለሙያዎቻቸው ሊመሰገኑ ይገባል ብለዋል።

በምርቃት ስነስርአቱ ላይ የተገኙት የውሃ እና ኢነርጂ ሚኒስቴር ሚኒስትር ክቡር ዶ/ር ኢ/ር ሀብታሙ ኢተፋ የፌደራል መንግስት ውሃ ላይ ይታይ የነበረውን ኢፍትሀዊ የውሃ አቅርቦት በፍትሀዊ መንገድ ሁሉንም ተጠቃሚ ለማድረግ በደቡብ ክልል 69 ፕሮጀክቶች ከ8.2 ቢሊየን ብር በላይ መድቦ በከተማና ገጠር እንዲሁም አርብቶ አደር አካባቢዎችን እጁን ዘርግቶ እያገዘ ይገኛል ብለዋል።

በመሆኑም በብድር የተገነባውን ፕሮጀክት በብድር አመላለስ ስርዓቱ መሠረት ተመላሽ ማድረግ ሌሎች አካባቢዎች የዚህ እድል ተጠቃሚ የሚያደርግ መሆኑን ልንገነዘብ ይገባልም ብለዋል።

ክቡር ሚኒስትሩ በማከል የሳውላ ከተማን የመጠጥ ውሃ ፕሮጀክት አጠናቀን ለአገልግሎት ስናበቃ ለህብረተሰቡ በፍትሀዊነት የውሃ ክፍፍል ማድረግ ደግሞ ከውሃ አገልግሎት ይጠበቃል ብለዋል።

በመጨረሻም ክቡር ሚኒስትሩ ህብረተሰቡ ክፍያውን በአግባቡ በመክፈል ፤ ፕሮጀክቱን በመንከባከብ፤ ብክነትን በመቀነስ መጠቀም ከቻለ ተጨማሪ ፕሮጀክት መስራት ይቻላል በማለት አሳስበዋል።

ፕሮጀክቱን ለተገበሩ አመራሮች፣ ባለሙያዎች ፣ ኮንትራክተሮች፣ አማካሪዎች እና ለክልሉ መንግስትና ለህብረተሰቡ ክቡር ሚኒስትሩ ምስጋና አቅርበዋል።

በእለቱ የአረንጓዴ አሻራ መርሃ ግብርም ተከናውኗል።

በመርሀ ግብሩ ላይ የክልሉ ርዕሰ መስተዳድር የውሃና ኢነርጂ ሚኒስትርን ጨምሮ የበላይ አመራሮች የሀገር ሽማግሌዎች ኮንትራክተሮችና የሚመለከታቸው አካላት ተሳትፈዋል።